ಸ್ಕೂಟರ್ ಮತ್ತು ಕಾರು 'ಕಾರ್ಟರ್' ಆದಾಗ..

                ಆಯಸ್ಸು ಮುಗಿದ ಮೇಲೆ ಮನುಷ್ಯ ಈ ಲೋಕದಿಂದ ಅದೃಶ್ಯನಾಗುತ್ತಾನೆ. ಅದರಂತೆಯೇ ಆತ ಸೃಷ್ಟಿಸಿದ ವಸ್ತುಗಳೂ ಕೂಡಾ ಹಳತಾದ ಮೇಲೆ ಗುಜರಿ ಸೇರುತ್ತವೆ. ಆದರೆ ಇಲ್ಲೊಂದು ಕೈನೆಟಿಕ್ ಹೋಂಡಾ ಸ್ಕೂಟರ್ ಹಳತಾದ ಮೇಲೆ ಮರುಹುಟ್ಟು ಪಡೆದಿದೆ. ವಾಹನಗಳ ಜಗತ್ತಿನಲ್ಲೇ ಹೊಸ ಮಾದರಿಯಾಗಿ ಬದಲಾಗಿದೆ. ಹಿಂದಿಗಿಂತಲೂ ಹೆಚ್ಚು ಆಕರ್ಷಕವಾಗಿ ಎಲ್ಲರನ್ನೂ ಆಕರ್ಷಿಸುತ್ತಿದೆ.

                ಇದನ್ನು ಸ್ಕೂಟರ್ ಎನ್ನುವುದೋ ಅಥವಾ ಕಾರ್ ಎನ್ನುವುದೋ ಎಂಬ ಗೊಂದಲ ಮೂಡುವುದು ಸಹಜ.  ಬಹುಶಃ ಕಾರ್ ಮತ್ತು ಸ್ಕೂಟರ್‌ಗಳ ಸಮ್ಮಿಲನ ಇದಾಗಿರುವುದರಿಂದ 'ಕಾರ್ಟರ್' ಎನ್ನಬಹುದು! ಅಸಲಿಗೆ ಇಂಥದ್ದೊಂದು ವಾಹನ ಈ ಹಿಂದೆ ಸೃಷ್ಟಿಯಾದ ಬಗ್ಗೆ ಹೆಚ್ಚಿನ ಮಾಹಿತಿಯಿಲ್ಲ. ಇಂತಹದೊಂದು ಹೊಸ ಪ್ರಯತ್ನಕ್ಕೆ ಕೈಹಾಕಿದವರು ಯಾವುದೋ ಇಂಜಿನಿಯರಿಂಗ್ ಕಾಲೇಜಿನ ವಿದ್ಯಾರ್ಥಿಗಳೆಂದು ನೀವು ಊಹಿಸಿದ್ದರೆ ಅದು ತಪ್ಪು. ಈ ಹೊಸ ವಿನ್ಯಾಸ ಸೃಷ್ಟಿಸಿದ್ದು ಪುಟ್ಟದೊಂದು ಗ್ಯಾರೇಜಿನ ಮೆಕ್ಯಾನಿಕ್‌ಗಳು! ಸುಭಾಸ್‌ನಗರದ ವಾಜ್ ಗ್ಯಾರೇಜಿನ ರವಿ ಪೂಜಾರಿ ಹಾಗೂ ಅರುಣ್ ಸೋನ್ಸ್ ಎಂಬ ಇಬ್ಬರು ಯುವ ಉತ್ಸಾಹಿಗಳು ತಮ್ಮ ಹೊಟ್ಟೆಪಾಡಿನ ದುಡಿಮೆಯ ಜೊತೆಗೆ ಈ ಸಾಹಸಕ್ಕೆ ಕೈ ಹಾಕಿದ್ದರು. ಅವರ ಎರಡು ತಿಂಗಳ ಪರಿಶ್ರಮಕ್ಕೆ ಇಂದು ಅದ್ಭುತ ಪ್ರತಿಫಲ ಸಿಕ್ಕಿದೆ.

                ರವಿಯವರಿಗೆ ಸ್ಕೂಟರಿಗೊಂದು ಸ್ಟೇರಿಂಗ್ ಅಳವಡಿಸುವ ಕನಸು ಬಹಳ ಹಿಂದಿನಿಂದಲೂ ಇತ್ತು. ಗ್ಯಾರೇಜಿನಲ್ಲಿ ಘನ ವಾಹನಗಳ ಮೆಕ್ಯಾನಿಕ್ ಆಗಿದ್ದ ಅರುಣ್ ಸೋನ್ಸ್ ಇವರ ಜೊತೆಯಾದ ಮೇಲೆ ಈ ವಿಚಾರ ಅವರಿಗೆ ತಿಳಿದಾಗ ಇದನ್ನು ಕಾರ್ಯರೂಪಕ್ಕೆ ತರುವ ಪ್ಲ್ಯಾನ್ ಹಾಕಿದರಂತೆ. ಅದೇ ಸಮಯಕ್ಕೆ ಮಿತ್ರರೊಬ್ಬರಿಂದ ಗುಜರಿಗೆ ಸೇರಲು ಕಾಯುತ್ತಿದ್ದ ಕೈನೆಟಿಕ್ ಹೋಂಡಾ ಸಿಕ್ಕಿತು. ಯಾವುದೇ ಗುರುವಿನ ಬೆಂಬಲ, ಸಹಕಾರ ಇಲ್ಲದೇ ಬರೀ ಕನಸಿನ ಕಲ್ಪನೆಗಳನ್ನೇ ನನಸಾಗಿಸ ಹೊರಟ ಇವರ ಪ್ರಯೋಗ ಎಷ್ಟು ಅದ್ಭುತವಾಗಿ ಯಶಸ್ಸು ಕಂಡಿತೆಂದರೆ ವಾಹನ ಕೊಟ್ಟವರಿಗೂ ಗುರುತಿಸಲಾಗದ ಮಟ್ಟಿಗೆ ಹೊಸರೂಪ ಪಡೆಯಿತು. ಮೂಲ ಇಂಜಿನ್ iತ್ತು ಬಾಡಿ ಬಿಟ್ಟರೆ ಇದರಲ್ಲಿ ಎಲ್ಲವೂ ಹೊಸತು. ಕಾರು ಚಲಾಯಸಿದಂತೆ ಇದನ್ನು ಆರಾಮವಾಗಿ ಚಲಾಯಿಸಬಹುದು. ಕಾರಿನಲ್ಲಿರುವಂತೆಯೇ ಆಕ್ಸಿಲೇಟರ್ ಮತ್ತು ಬ್ರೇಕ್ ಪೆಡಲ್ ಮಾಡುವ ಸೌಲಭ್ಯ ಇದರಲ್ಲಿದೆ. ಸ್ಟಿಯರಿಂಗ್ ಪಕ್ಕದಲ್ಲೇ ತುರ್ತಾಗಿ ಒತ್ತಬಹುದಾದ ಹ್ಯಾಂಡ್‌ಬ್ರೇಕ್ ಇದೆ. ಗೇರ್‌ನ ಹಂಗಿಲ್ಲದೆ ಒಳ್ಳೆಯ ಪಿಕಪ್ ಕೊಡುತ್ತಿದೆ. ಬೈಕ್ ರೈಡಿಂಗ್, ರ್‍ಯಾಲಿಗಳನ್ನು ನೆನಪಿಸುವ ಎಚ್.ಆರ್.ಸಿ. ಸೈಲೆನ್ಸರ್ ಕೂಡಾ ಅಳವಡಿಸಿದ್ದಾರೆ. ಹೇಗೂ ರಸ್ತೆಗಿಳಿಸಲು ಪರ್ಮಿಶನ್ ಇಲ್ಲವಲ್ಲ!

                'ಕಾರ್ಟರ್' ಸೃಷ್ಟಿಯ ವೆಚ್ಚ ಅಂದಾಜು 25000 ರೂಪಾಯಿಗಳು. ಬೇರೆ ವಾಹನಗಳ ಆಲ್ಟರೇಶನ್‌ಗೆ ಹೋಲಿಸಿದರೆ ಇದು ತೀರಾ ಕಮ್ಮಿ. ಇದಕ್ಕೆ ಕಾರಣವೂ ಇದೆ. ಇಬ್ಬರೂ ಮೆಕ್ಯಾನಿಕ್‌ಗಳೇ ಇದರ ಸೃಷ್ಟಿಕರ್ತರಾಗಿರುವುದು ಒಂದೆಡೆಯಾದರೆ ಇವರ ಹಿತೈಷಿ ಡೇನಿಯಲ್ ಅಮ್ಮಣ್ಣ ವಾಹನ ತಯಾರಿಯ ಪ್ರತಿಯೊಂದು ಹಂತದಲ್ಲೂ ವೆಲ್ಡಿಂಗ್ ಇತ್ಯಾದಿ ಸಲಕರಣೆಗಳನ್ನು ನೀಡಿ ಹೆಚ್ಚಿನ ಹೊರೆಯಗದಂತೆ ಸಹಕರಿಸಿದ್ದಾರೆ. ಈ ವಾಹನವನ್ನು ಕಂಡ ಹಿರಿ-ಕಿರಿಯರೆಲ್ಲರೂ ಇದನ್ನು ಚಲಾಯಿಸಲು ಹಾತೊರೆಯುತ್ತಿರುವುದು ಹಾಗೂ ಈ ವಿಚಿತ್ರ ವಾಹನ ಚಲಾಯಿಸಿ ಖುಷಿಪಡುತ್ತಿರುವುದು ಗ್ಯಾರೇಜ್ ಯುವಕರಲ್ಲಿ ಸಂತಸ ತಂದಿದೆ; ಇನ್ನಷ್ಟು ಹೊಸ ಕನಸುಗಳು ಮೂಡತೊಡಗಿವೆ. ಇಂತಹ ವಾಹನಗಳಿಗೆ ಸದ್ಯಕ್ಕಂತೂ ಅನುಮತಿ ಸಿಗದಿದ್ದರೂ ಮುಂದೊಂದು ದಿನ 'ಕಾರ್ಟರ್' ರಸ್ತೆಗಿಳಿಯುತ್ತದೆ ಎಂಬ ನಂಬಿಕೆ ಇವರದು. ಅಂತಹಾ ದಿನಗಳು ಆದಷು ಬೇಗನೆ ಬರಲಿ ಹಾಗೂ ಕನಸು ಕಾಣುವ ಯುವ ಮನಸ್ಸುಗಳಿಗೆ ಇದೊಂದು ಪ್ರೇರಣೆಯಾಗಲಿ ಎಂಬುದೇ ನಮ್ಮ ಹಾರೈಕೆ.